Fonte: Ubaldo Mazzini "Poesie in vernacolo" Editori Laterza 1989
A CANSON DO SPRUGOOTO
o sia e gente ch’a rompa e cuge a l’aigua
(cansoneta abretio pe’ er Carlevà de l’ano 1895)
Forsa, fanti! daghe, dai!
Deghe drento a che ciù pè!
I è a sorgente di dinai
Questo foo ch’à trapanè!
Pin, pon, pa!
I è a fortuna dea sità.
Presto presto a vedeemo
Vegnie fea na gran funtana,
E ciù fito ch’à faemo,
La vè esse tanta mana!
Pon, pa, pin!
L’è a fortuna di Spezin!
Con quest’aigua a lagheemo
Tute e strade e tute e ca,
E chi sa che rafia a femo
A qei là dea Socieà!
Pin, pa, pon!
L’è a fortuna dea nassion.
E chi sa che gran onoe
Con quest’aigua i se faà
Quela sima d’assessoe,
Ch’ì è sta lu che l’anventà!
Pin, pon, pa!
Ar vedeemo decorà.
O d’argento o de papeo
Na cruzeta la saà
Per me figio l’anzegneo,
Ch’ì è sta lu ch’ì ha sorvegià.
Pon, pa, pin!
Ir fean come Capelin.
E Tusati l’assistente
O stipendio i aveà umentà;
I sta a vede e i ne fa gnente,
L’è ‘nzà ‘n pesso chi se sa.
Pin, pa, pon!
Che cucagna, angue de non!
Forsa, fanti, ch’à ghe semo!
Anca quarche corpetin,
E a momenti a troveemo
A gran cava di quatrin!
Pin, pon, pa!
Che fortuna pea sità!
Tranta metri e ciù abundanti
A l’avemo ‘nzà enficà,
La ghe ‘n vè anca autretanti,
Poi quarcò la sortià.
Pon, pa, pin!
Anca quarche corpetin.
Pica e dai, e dai e pica,
L’è ‘nza ‘n mese che se dà,
E per quanto i se gh’anfica
Ne ven gnente fea, ‘n veità!
Pin, pa, pon!
Forsa, aa fin la vegnià ‘r bon!
Pompa, suga, spinza e sfonda,
Sortià quarcò aa fin!
Ma per quanto i se sprefonda
Ne ‘n ven fea manco ‘n gussin!
Pon, pin, pa!
Cos’i dizo pea sità?
Siti!... siti!... atenti, fanti,
Che quarcò la s’è trovà!
Forsa, presto! avanti, avanti!
Mila chi l’umidità!
Pon, pa, pin!
Vegnì a vedela, Spezin!
Oh, che grossa carognada
Che s’è fato, cai Spezin!
La paa tuta na pissada
De ‘n fanteto picenin!
Pin, pa, pon!
Che fegua da belinon!